વાંકાનેર પંથકમાં દીપડાનો આતંક યથાવત વાછરડાનું મારણ કર્યું ખેડૂતો તથા પશુપાલકો ભયભીત

સ્થાનિકોના જણાવ્યા અનુસાર બીજા વાછરડાનું મારણ કરે તે પહેલાં ખેડૂતો તથા પશુપાલકો પહોંચી જતા બીજા વાછરડાને બચાવી લેવામાં આવ્યું હતું

વાંકાનેર : શિયાળાની શરૂઆત થતા જ વાંકાનેરના ગ્રામ્ય વિસ્તારોમાં દીપડાનો આતંક શરૂ થઈ ગયો છે. જેમાં આજે લોકોના જણાવ્યા મુજબ ત્રણ દીપડા એ મહિકા અને હોલમઢ વચ્ચે આવેલી કાબરાની ઢાર પાછળ વાડીમાં ઘૂસી એક વાછરડાનું મારણ કર્યું હતું. જ્યારે બીજા વાછરડા પર હુમલો કરે તે પહેલાં બચાવી લેવામાં આવ્યું હતું.

પ્રાપ્ત માહિતી મુજબ મહિકા અને હોલમઢ વચ્ચે આવેલી કાબરાની ઢાર પાછળ ઘેલાભાઈ ભરવાડની વાડીમાં બાંધેલા વાછરડાઓ પર એક સાથે ત્રણ દીપડાએ હુમલો કર્યો હતો જેમાં એક વાછરડાનું મારણ કર્યુ હતું તેવામાં વાડીમાં રહેલા લોકો આવી પહોંચતા દીપડાઓ ભાગી છૂટ્યા હતા તેથી સદનસીબે બીજું વાછરડું બચી જવા પામ્યું હતું.

હજુ તો શિયાળાની શરૂઆત થઈ છે ત્યાં જ એક સાથે ત્રણ દીપડાએ આતંક મચાવતા લોકોમાં ગભરાટ ફેલાયો છે અને પાલતુ પ્રાણીઓ પર જોખમ વધી ગયું છે ત્યારે પંથકના ખેડૂતો તથા પશુપાલકો દ્વારા માંગ કરવામાં આવી છે કે હવે વધુ પશુઓ તેમજ માનવ જિંદગી મોતના મુખમાં ધકેલાઈ નહિ તે માટે વન વિભાગ દ્વારા તાત્કાલિક પાંજરા ગોઠવી દીપડાને પાંજરે પુરવા કામગીરી હાથ ધરવામાં આવે.